Ты ўспомнi ўсё

З мінулага (Згадай)

Калі вясною закукуе
Зязюля ў лесе раніцой,
Ты прыгадай вясну другую,
Сустрэчы нашыя з табой.

Згадай усё, што сэрцу міла,
Што сэрцу дорага было,
Што адцвіло, адгаманіла,
Адкукавала, адышло.

Ты ўспомні ўсё, што нам жадала
Зязюля ў гучным гушчары,
Забудзь, што ў хованкі гуляла
Жаданне з намі да зары.

Забудзь, што рэху не вярнуцца
Ні да цябе, ні да мяне,
Забудзь… Хай сэрцы адгукнуцца
Адно другому па вясне.

Аркадзь Куляшоў
23.4.74 г.
Мінск

музык- Iгар Лучанок
арыгiнал: ВIА "Чараўнiцы" "Ты прыгадай" (1979г.)